ភ្នំពេញ៖ នៅថ្ងៃទី២៦ ខែកុម្ភៈ នេះ លោកឧបការីរដ្ឋមន្រ្តីក្រសួងការបរទេសសហរដ្ឋអាមេរិក Kritenbrink និងលោក Royal ឧបការីរងជាន់ខ្ពស់រដ្ឋមន្ត្រីក្រសួងការពារជាតិសហរដ្ឋអាមេរិកទទួលបន្ទុកកិច្ចការសន្តិសុខនៅតំបន់ឥណ្ឌូប៉ាស៊ីហ្វិក បានជួបជាមួយនាយករដ្ឋមន្រ្តី ហ៊ុន ម៉ាណែត នៅរាជធានីភ្នំពេញ ដើម្បីពិភាក្សាអំពីដំណើរការទំនាក់ទំនងទ្វេភាគីរវាងសហរដ្ឋអាមេរិក និងកម្ពុជា ឱ្យមានភាពស៊ីជម្រៅ និងដើម្បីដោះស្រាយបញ្ហាដែលជាកង្វល់រួម។
ភាគីទាំងពីរ បានពិភាក្សាអំពីកិច្ចសហប្រតិបត្តិការដែលកំពុងតែមានដូចជាការអនុវត្តទណ្ឌកម្មរបស់អង្គការសហប្រជាជាតិ ប្រឆាំងនឹងសាធារណរដ្ឋប្រជាមានិតប្រជាធិបតេយ្យកូរ៉េ ការថ្កោលទោសការឈ្លានពានទៅលើប្រទេសអ៊ុយក្រែន ពីសំណាក់ប្រទេសរុស្ស៊ី កម្មវិធីជំនួយបរទេស ការរុករកឈ្លើយសឹក និងយុទ្ធជនបាត់ខ្លួនក្នុងសង្គ្រាម និងការពង្រឹងការអនុវត្តច្បាប់ដោយទន្ទឹមនឹងនោះក៏ពិនិត្យទៅលើវិស័យនានា សម្រាប់វឌ្ឍនភាពនាពេលខាងមុខនៅប្រទេសកម្ពុជា ដូចជាលទ្ធិប្រជាធិបតេយ្យ និងសិទ្ធិមនុស្ស ការជួញដូរមនុស្ស ការបង្កើតលទ្ធភាពសម្រាប់ប្រព័ន្ធផ្សព្វផ្សាយឯករាជ្យ និងមានភាពសេរី ព្រមទាំងបញ្ហាសន្តិសុខតំបន់ផងដែរ។
នៅក្នុងកិច្ចពិភាក្សាគ្នានោះ លោកឧបការីរដ្ឋមន្រ្តីការបរទេសអាមេរិកលោក Kritenbrink បានថ្លែងបញ្ជាក់ថា៖ «សហរដ្ឋអាមេរិកនៅតែមានការប្តេជ្ញាចិត្តចំពោះប្រជាជនកម្ពុជា និងបំណងប្រាថ្នារបស់ពួកគេដោយចង់ឱ្យប្រទេសរបស់គេមានវិបុលភាព លទ្ធិប្រជាធិបតេយ្យ និងឯករាជ្យ ដែលក្នុងនោះសំឡេងរបស់ពួកគេត្រូវត្រូវបានទទួលស្តាប់ និងគោរព ហើយអធិបតេយ្យភាពរបស់កម្ពុជាត្រូវបានការពារ»។
លោកឧបការីរដ្ឋមន្រ្តីការបរទេស Kritenbrink ថែមទាំងបានជួបប្រាស្រ័យជាមួយយុវជនកម្ពុជាក្នុងគម្រោងស្តីពីគំនិតផ្តួចផ្តើមនៃមេដឹកនាំយុវជនវ័យក្មេងនៅតំបន់អាស៊ីអាគ្នេយ៍ (YSEALI) ក្នុងន័យអបអរខួបលើកទី១០ នៃកម្មវិធីផ្លាស់ប្តូរថ្នាក់តំបន់មួយនេះ៕
រូបភាពដោយ៖ ស្ថានទូតអាមេរិកប្រចាំនៅកម្ពុជា
