ភ្នំពេញ៖ ថ្ងៃទី៧ ខែមេសា ឆ្នាំ២០២២ ក្រុមហ៊ុន Overseas Cambodian Investment Corporation (OCIC) បានទទួលបានពានរង្វាន់ Hall of Fame លើកដំបូងគេបង្អស់នៅក្នុងកម្មវិធី Cambodia Real Estate Awards 2022 Gala (CREA) ដែលធ្វើឡើងនៅសណ្ឋាគារសូហ្វីតែលភ្នំពេញនាល្ងាចថ្ងៃព្រហស្បតិ៍។ ពានរង្វាន់ Hall of Fame ត្រូវបានបង្កើតឡើងដើម្បីលើកតម្កើង ថែរក្សា និងបន្តកេរ្តិ៍ឈ្មោះ ជាមួយស្នាដៃដ៏ឆ្នើមរបស់ថ្នាក់ដឹកនាំអចលនទ្រព្យ ដែលមានការខិតខំប្រឹងប្រែងកសាងនៅក្នុងវិស័យអចលនទ្រព្យនៅក្នុងព្រះរាជាណាចក្រកម្ពុជា។
ក្រុមហ៊ុន OCIC ជាក្រុមហ៊ុនឯកជនដែលមានការដឹកនាំ និងគ្រប់គ្រងដោយ អ្នកឧកញ៉ា បណ្ឌិត ពុង ឃាវសែ។ មិនត្រឹមតែបង្កើត និងអភិវឌ្ឍន៍អចលនទ្រព្យ ម៉ាកយីហោ តែប៉ុណ្ណោះទេ ថែមទាំងលើកស្ទួយ និងជួយសម្រេចក្តីសុបិន្ដរបស់ប្រជាជនកម្ពុជាជាច្រើនតាមរយៈការផ្តល់ឱកាសឱ្យពួកគេអាចធ្វើការវិនិយោគទៅលើគេហដ្ឋាន និងនៅក្នុងសហគម ដែលប្រកបដោយគុណភាព និងផាសុខភាពខ្ពស់។
អ្នកឧកញ៉ា វេជ្ជបណ្ឌិត ពុង ឃាវសែ បានមានប្រសាសន៍ថា៖ «ក្នុងនាមជាថ្នាក់ដឹកនាំរបស់ OCIC និងតំណាងឱ្យបុគ្គលិកជាង ១៥,០០០នាក់ របស់ខ្ញុំ វាគឺជាកាតព្វកិច្ចរបស់ខ្ញុំក្នុងការដឹកនាំ និងជំរុញលើកទឹកចិត្ត នៅកន្លែងធ្វើការ ដើម្បីផ្តល់ជាចក្ខុវិស័យ ទិសដៅ ណែនាំ និងលើកទឹកចិត្តទៅប្រជាជនខ្មែរ។ ដូច្នេះហើយ OCIC នឹងនៅតែបន្តរក្សាការប្រកួតប្រជែងរបស់ខ្លួននៅក្នុងទីផ្សារអចលនទ្រព្យតទៅទៀត»។
បច្ចុប្បន្ន OCIC គឺជាក្រុមហ៊ុនអភិវឌ្ឍន៍អចលនទ្រព្យធំជាងគេ និងឈានមុខគេក្នុងប្រទេសកម្ពុជា នេះបើយោងទៅតាមទំហំវិនិយោគ និងគម្រោងមួយចំនួនដែលបានអភិវឌ្ឍមកទល់ពេលនេះ។ ជំនាញសំខាន់ៗ របស់ក្រុមហ៊ុន គឺការអភិវឌ្ឍន៍អចលនទ្រព្យ ទីក្រុងរណប ការគ្រប់គ្រងអចលនទ្រព្យ ជាមួយនឹងគម្រោងសំខាន់ៗ ដូចជាអាកាសយានដ្ឋានអន្តរជាតិភ្នំពេញថ្មី ទីក្រុងកោះពេជ្រ កោះនរា ទីក្រុងរណបជ្រោយចង្វារ និងទីក្រុងអូឡាំព្យា៕
អត្ថបទពាណិជ្ជកម្ម
