ភ្នំពេញ៖ ថ្ងៃព្រហស្បតិ៍្ត ទី២៧ ខែកុម្ភៈនេះ ស្ថានទូតបារាំងប្រចាំនៅកម្ពុជាបានបេីកសិន្និសីទសារព័ត៌មានស្តីពីព្រឹត្តិការណ៍ «ដំណើរត្រាច់ចរសិល្បៈ» ជាលើកទី២ នៅក្នុងឧទ្យាន។
ការបើកទ្វារជាសាធារណៈ ជាថ្មីម្តងទៀតនឹងធ្វេីឡេីងតែមួយថ្ងៃ គឺនៅថ្ងៃសៅរ៍ ទី៧ ខែមីនា ឆ្នាំ២០២០ នាពេលខាងមុខនេះក្នុងឱកាសតាំងពិព័រណ៍ «ដំណើរត្រាច់ចរសិល្បៈ» ជាលើកទី២។
សិល្បករល្បីៗ ចំនួន៩រូប ក្នុងនោះមានខ្មែរ ៨នាក់ និងបារាំងមួយនាក់ ត្រូវបានអញ្ជើញឲ្យបង្កើតស្នាដៃសិល្ប:តាមការស្រមើ ស្រមៃរៀងៗ ខ្លួនដើម្បីដាក់បង្ហាញជូនដល់មហាជន។
ជាមួយរុក្ខជាតិចម្រុះពណ៌ និងដើមឈើធំៗ ចោលម្លប់ ត្រឈឹងត្រឈៃ ស្នាដៃសិល្ប:ទាំងនោះ នឹងដាក់តាំងនៅតាមទីកន្លែងផ្សេងៗ គ្នាក្នុងឧទ្យាន ហាក់ដូចជាកំពុងបង្កើតបានកិច្ចសន្ទនាបែបមនោសញ្ចេតនាមួយ យ៉ាងស្ងប់ស្ងាត់ជាមួយនឹងធម្មជាតិ។ ជាកន្លែងដែលចងចាំនៃប្រវត្តិសាស្រ្តកម្ពុជា និងជាលំហបៃតង ដ៏ធំជាងគេមួយនៅក្នុងរាជធានីភ្នំពេញ ដែលកំពុង អវិវឌ្ឍឥតឈប់ឈរ ឧទ្យានស្ថានទូតបារាំងតែងទាក់ទាញចំណាប់អារម្មណ៍របស់សិល្បករនានា។
ជាក់ស្តែង ក្នុងពិព័រណ៍ «ដំណើរត្រាច់ចរសិល្បៈ» ឆ្នាំ២០២០នេះ លោក អ៊ុក ជឹម វិចិត្រ, លោក ក្រេហ្កូរី ហ្គោស ឡាំង, លោក រៀម មុនី ស៊ីឡុង, លោក ម៉ក់ រ៉េមីស្សា, លោក លាង ស៊ីកន, លោកស្រី បណ្តូល, លោក មាស សុឃន, លោក ពេជ្រ សុភាព និងលោក ទិត្យ វាសនា នឹងដាក់បង្ហាញស្នាដៃសិល្បៈសហសម័យរបស់ខ្លួន ដែលត្រូវបានរចនាឡើងជាពិសេសសម្រាប់ព្រឹត្តការណ៍នេះ ហើយមានលក្ខណៈសមសួនជាមួយនឹងបរិស្ថានធម្មជាតិរបស់ស្ថានទូត។
ជាមួយទេពកោសល្យផ្សេងៗគ្នា សិល្បករភាគច្រើនបានជ្រើសរើសយកដើមឈើដើម្បីផ្សារភ្ជាប់ជាមួយស្នាដៃសិល្បៈរបស់ខ្លួន។ លោកជំទាវ អេវ៉ា ង្វៀន ប៊ិញ ឯកអគ្គរដ្ឋទូតបារាំងប្រចាំកម្ពុជា យល់ឃើញថា ក្រៅពីលក្ខណ:លម្អ ដើមឈើទាំងនេះបានក្លាយទៅជាតួអង្គពិតៗ របស់ពិព័រណ៍នេះ ។
លោកជំទាវមានប្រសាសន៍ថា ៖ «តាមរយៈការរចនារបស់សិល្បករ ដើមឈើទាំងនេះបានក្លាយទៅជាសភាវរស់ម៉្យាងប្រកបដោយរូបឆោមលោម ពណ៌ ល្អដែលយើងត្រូវថែរក្សាផង ជាទីជម្រក និងជាសាក្សីនៃការចងចាំផង។ ដើមឈើទាំងនេះហាក់ដូចជាវត្ថុនឹងថ្កល់ ដែលផ្តល់អត្ថន័យដល់ជីវិត»។
ស្ថានទូតបារាំង ដោយរួមសហការជាមួយវិទ្យាស្ថានបារាំងនៅកម្ពុជា បានផ្តួចផ្តើមគម្រោងនេះឡើងដើម្បីលើកស្ទួយតម្លៃនៃការបង្កើតស្នាដៃសិល្បៈ និងកិច្ចសហប្រតិបត្តិការវប្បធម៌បារាំង-កម្ពុជា។
សាធារណជនអាចចូលទៅធ្វើដំណើរត្រាច់ចរកម្សាន្តនៅក្នុងឧទ្យានស្ថានទូត ដើម្បីទស្សនាស្នាដៃសហសម័យរបស់សិល្បករនៅក្នុង បរិស្ថានដ៏ស្រស់បំព្រងមួយ នៅថ្ងៃសៅរ៍ ទី៧ ខែមីនា ខាងមុខចាប់ពីម៉ោង ៨ព្រឹក ដល់ម៉ោង ៤រសៀល។
ព្រឹតិ្តការណ៍នេះនឹងបើកឲ្យសាធារណជនចូលរួមដោយសេរី ដោយពុំចាំបាច់ចុះឈ្មោះជាមុននោះទេ ប៉ុន្តែអាហារ ភេសជ្ជៈជាមួយនឹងកាបូបធំៗ មិនត្រូវបានអនុញ្ញាតឲ្យយកចូលឡើយ៕
រូបថតដោយ៖ អេងលី ទុយ (សាគូរ៉ា) & សហការី
