ពិព័រណ៍នេះត្រូវបានរៀបចំឡើងដើម្បីអបអរសាទរវត្តមាន២៥ ឆ្នាំ នៃស្ថាបត្យកម្មបារាំងនៅកម្ពុជាដែលបានវិវត្តជាបន្តបន្ទាប់ទៅរកទស្សនវិស័យកាន់តែទូលំទូលាយដោយឆ្លុះបញ្ចាំងពីតម្លៃនៃសហគមន៍ហ្វ្រង់កូហ្វូនី (Francophonie) រួមមាន៖ ការសន្ទនា ភាពចម្រុះ និងការកសាងរួមគ្នា។ ក្នុងទិសដៅឆ្ពោះទៅរកកិច្ចប្រជុំកំពូលហ្វ្រង់កូហ្វូនីដែលនឹងប្រព្រឹត្តទៅក្នុងខែវិច្ឆិកា ឆ្នាំ២០២៥ នៅរាជធានីភ្នំពេញពិព័រណ៍ «ការបន្ស៊ាំខ្លួនទៅនឹងបរិបទ» ជាសក្ខីភាពសមត្ថភាពរបស់អ្នកនិយាយភាសាបារាំង និងប្រជាជនកម្ពុជាក្នុងកិច្ចសហការដើម្បីដោះស្រាយបញ្ហាប្រឈមសម័យទំនើបទាំងផ្នែកនគរូបនីយកម្ម បរិស្ថាន និងសង្គម ។

ការតាំងពិព័រណ៍នេះត្រូវបានរៀបចំឡើងជុំវិញប្រធានបទបីដែលរៀបចំដំណើរទស្សនា៖

លំហឯកជន និងសាធារណៈ៖ តើស្ថាបត្យកម្មកម្ពុជាសម័យ​ទំនើបបែងចែករវាងលំហឯកជន និងទីកន្លែងរួមយ៉ាងដូចម្តេច? នៅអាស៊ីអាគ្នេយ៍ច្រកចេញចូលតែងមានភាពបត់បែនមុខអគារបើកចំហរទៅផ្លូវ ហើយលំហរួមត្រូវបានសង់ឡើងតាមការប្រើប្រាស់ និងភាពជិតស្និទ្ធ​។

ការអភិរក្ស និងការបង្កើតឡើងវិញនូវបេតិកភណ្ឌ៖ ពីវិមានសម័យ​អង្គររហូតដល់ស្ថាបត្យកម្មសម័យអាណានិគមឆ្លងកាត់សម័យសង្គមរាស្ត្រនិយម និងសំណង់ក្រោយសម័យសង្គ្រាម សំណង់ប្រវត្តិសាស្ត្រទាំងនេះមិនមែនគ្មានតម្លៃនោះទេ ប៉ុន្តែជាធនធានដែលអាចយកមកប្រើប្រាស់ឡើងវិញ។ ការកែច្នៃ ការបន្ស៊ាំ និងការប្រើប្រាស់ឡើងវិញ ក្លាយជាសកម្មភាពដែលគិតគូរទាំងបរិស្ថាន និងវប្បធម៌។

ការបន្ស៊ាំទៅនឹងលក្ខខណ្ឌអាកាសធាតុ៖ នៅក្នុងតំបន់ត្រូពិច ការរចនាមានន័យថា ការរួមបញ្ចូលគ្នាជាមួយខ្យល់ ម្លប់ ភ្លៀង និងវត្ថុធាតុដើម។ ស្ថាបត្យកម្មក្លាយជាឧបករណ៍សម្រួលអាកាសធាតុនៅពេលដែលបញ្ចូលកត្តាទាំងនេះយ៉ាងពេញលេញ ដោយមិនពឹងផ្អែកលើបច្ចេកវិទ្យាដោយប្រើដំណោះស្រាយតាមបរិបទជាក់ស្តែង។

ដើម្បីបង្ហាញពីប្រធានបទទាំងនេះ វិចិត្រសាលមានការដាក់បង្ហាញសម្ភារជាច្រើនដូចជា៖ ប្លង់គំរូ រូបថត ប្លង់បច្ចេកទេស និងវត្ថុធាតុដើមដែលដកស្រង់ចេញពីគម្រោងជាក់ស្តែង។ ការរៀបចំពិព័រណ៍ដែលរចនាដោយភ្នាក់ងារ Melon Rouge Agency ផ្តល់ជូននូវបទពិសោធន៍ដ៏អស្ចារ្យហើយសាធារណជនអាចចូលទស្សនា​អគារប្រចាំថ្ងៃ និងសំណង់ល្បីៗ ក្នុងជ្រុងថ្មីមួយដែលបង្ហាញពីសំណង់តក្កអរូបិយនៅជុំវិញយើង (ការសាងសង់តាមជំនឿ និងហុងស៊ុយ)។

«ពិព័រណ៍នេះកើតចេញពីបំណងប្រាថ្នាសាមញ្ញមួយ គឺបង្ហាញពីអ្វីដែលកំពុងត្រូវបានសាងសង់នៅទីនេះ ក្នុងប្រទេស កម្ពុជា ដោយស្ថាបត្យករដែលគិតគូរ និងរចនា ដែលមានទំនាក់ទំនងជាមួយទឹកដីខ្មែរជានិច្ច។ ជាការសន្ទនារវាងវប្បធម៌ បេតិកភណ្ឌ និងការរចនា។ ក្នុងទិសដៅឆ្ពោះទៅរកកិច្ចប្រជុំកំពូលហ្វ្រង់កូហ្វូនី ពិព័រណ៍ការរបន្ស៊ាំខ្លួនទៅនឹងបរិបទ  គឺជាភស្តុតាងជាក់ស្តែងនៃការប្តេជ្ញាចិត្តរបស់យើង៖ កិច្ចសហប្រតិបត្តិការវប្បធម៌បារាំង-កម្ពុជា មិនមែនគ្រាន់តែជារូបភាពខាងក្រៅឡើយ ប៉ុន្តែវាគឺជាការរួមគ្នាស្ថាបនាដែលទាមទារការយកចិត្តទុកដាក់ និងមានភាពរស់រវើក»។​ នេះជាការលើកឡើងពី Fanny Pagès អនុប្រធានវិទ្យាស្ថានបារាំងកម្ពុជា និងជាអនុព័ន្ធវប្បធម៌។

ដូចគ្នានឹងការតាំងពិព័រណ៍ផ្សេងៗ ដែរ វិទ្យាស្ថានបារាំងកម្ពុជាផ្តល់ជូននូវកម្មវិធីអមដ៏សម្បូរបែបដែលត្រូវបានរចនាឡើងដើម្បីទាក់ទាញអ្នកទស្សនាទូទៅ និងធ្វើឱ្យប្រធានបទកាន់តែស៊ីជម្រៅ៖ ការនាំទស្សនាសម្រាប់សិស្សានុសិស្ស និងអង្គការក្រៅរដ្ឋាភិបាល កិច្ចពិភាក្សាតុមូលជុំវិញប្រធានបទពិព័រណ៍ក៏ដូចជាភាពយន្តស្តីពីស្ថាបត្យកម្ម ជាពិសេសការបញ្ចាំងខ្សែភាពយន្តឯកសារ «Moriyama-San» របស់ Ila Bêka និង Louise Lemoine អមដោយការអត្ថាធិប្បាយរបស់​ស្ថាបត្យករ​​ Antoine Miennel (Bloom Architecture) នៅថ្ងៃទី៣០ ខែឧសភា ខាងមុខ៕

រូបភាពដោយ៖ សហការី

តាមរយៈការផ្តល់ជំនួយហិរញ្ញវត្ថុប្រមាណជាង ១,៥លានដុល្លារអាមេរិកពីរដ្ឋាភិបាលជប៉ុន គម្រោងរំពឹងថានឹងបានជួយទៅដល់កម្មកររោងចក្រជាង ៥០.០០០នាក់ ជាពិសេសក្នុងវិស័យកាត់ដេរ និងវាយនភណ្ឌចំនួន ១១៨រោងចក្រនៃតំបន់សេដ្ឋកិច្ចពិសេសភ្នំពេញរ៉ូយ៉ាល់គ្រុប និងតំបន់សេដ្ឋកិច្ចពិសេសកណ្តាលរ៉ូយ៉ាល់គ្រុបសម្រាប់រយៈពេល ៥ឆ្នាំ។

គម្រោងនេះត្រូវបានដាក់ឈ្មោះថា «ការលុបបំបាត់វដ្តនៃកង្វះអាហារូបត្ថម្ភនៅកម្ពុជា៖ ការពង្រឹងរបបអាហារសម្រាប់កម្មករ កម្មការិនីរោងចក្រ» ដែលត្រូវបានប្រកាសដាក់ឱ្យអនុវត្តជាផ្លូវការនៅតំបន់សេដ្ឋកិច្ចពិសេសភ្នំពេញក្នុងគោលបំណងដោះស្រាយបញ្ហាកង្វះសារធាតុចិញ្ចឹមសំខាន់ៗ ព្រមទាំងលើកកម្ពស់សុខមាលភាព និងផលិតភាពការងាររបស់កម្មករ។

លោក MATSUDA Junsaku ទីប្រឹក្សានៃស្ថានទូតជប៉ុនប្រចាំកម្ពុជា បានបញ្ជាក់សារជាថ្មីនូវការប្តេជ្ញាចិត្តរបស់ប្រទេសជប៉ុនចំពោះការអភិវឌ្ឍប្រកបដោយបរិយាបន្ន និងចីរភាពថា៖ «ជប៉ុនពិតជាមានមោទនភាពក្នុងការគាំទ្រកម្ពុជា ដោះស្រាយបញ្ហាកង្វះអាហារូបត្ថម្ភ ជាមួយការដាក់ចេញនៅដំណោះស្រាយជាក់ស្តែងដែលអាចពង្រីកវិសាលភាពបានសម្រាប់ថ្ងៃអនាគត។ តាមរយៈការលើកកម្ពស់លទ្ធភាពទទួលបានអាហាររូបត្ថម្ភសម្រាប់កម្មករ កម្មការិនី គំនិតផ្តួចផ្តើមនេះមិនត្រឹមតែរួមចំណែកដល់លទ្ធផលសុខភាពកាន់តែប្រសើរប៉ុណ្ណោះទេ ប៉ុន្តែថែមទាំងជួយឱ្យសហគមន៍កាន់តែរឹងមាំ និងសេដ្ឋកិច្ចកាន់តែមានភាពធន់ជាងមុនផងដែរ»។

វិស័យរោងចក្រកាត់ដេរនៅកម្ពុជា គឺជាវិស័យដ៏សំខាន់សម្រាប់កំណើនសេដ្ឋកិច្ចដែលបានផ្តល់ការងារជាច្រើនកន្លែងសម្រាប់ប្រជាជនកម្ពុជា។ ប៉ុន្តែកម្មករជាច្រើន ជាពិសេសស្ត្រីនៅតែប្រឈមនឹងអត្រាកង្វះអាហារូបត្ថម្ភខ្ពសរួមទាំងមានភាពស្លេកស្លាំង និងកង្វះសារធាតុចិញ្ចឹមផ្សេងៗ ទៀត។ បញ្ហានេះមិនត្រឹមតែប៉ះពាល់ដល់សុខុមាលភាពបុគ្គលប៉ុណ្ណោះទេ ប៉ុន្តែថែមទាំងជះឥទ្ធិពលដល់ផលិតភាពការងារ ចំណូល និងការអភិវឌ្ឍជាតិផងដែរ។

តាមរយៈគម្រោងនេះ កម្មវិធីស្បៀងអាហារពិភពលោក និងដៃគូពាក់ព័ន្ធគ្រោងដាក់បញ្ចូលអង្ករមីក្រូសារជាតិសម្រាប់អាហារប្រចាំថ្ងៃនៅតាមរោងចក្រដើម្បីធានាថាកម្មករទទួលបានវីតាមីន និងសារធាតុរ៉ែចាំបាច់ជាច្រើន។ ដោយសារអង្ករ គឺជាអាហារមូលដ្ឋានប្រចាំថ្ងៃ ដូចនេះការបន្ថែមសារធាតុចិញ្ចឹមគឺជាដំណោះស្រាយដ៏មានប្រសិទ្ធភាព និងចំណាយតិចដោយមិនតម្រូវឱ្យមានការផ្លាស់ប្តូរទម្លាប់ទទួលទាននោះទេ។

គម្រោងនេះនឹងធ្វើការយ៉ាងជិតស្និទ្ធជាមួយម្ចាស់រោងចក្រ អ្នកផ្គត់ផ្គង់ និងអ្នកពាក់ព័ន្ធថ្នាក់ជាតិដោយ៖

• បញ្ចូលអង្ករមីក្រូសារជាតិទៅតាមអាហារដ្ឋាននៅកន្លែងធ្វើការ
• ពង្រឹងខ្សែសង្វាក់ផ្គត់ផ្គង់ និងត្រួតពិនិត្យគុណភាពអាហារដែលបានបន្ថែមសារធាតុចិញ្ចឹម
• កសាងសមត្ថភាពបន្ថែមដល់អ្នកដាំដុះ និងម្ចាស់រោងម៉ាស៊ីនកិនស្រូវ
• លើកកម្ពស់ការយល់ដឹងដល់កម្មករអំពីអត្ថប្រយោជន៍នៃអាហារូបត្ថម្ភ

លោកស្រី ឃ្យុងណាន់ ផាក (Kyung-nan Park) នាយិកាកម្មវិធីស្បៀងអាហារពិភពលោកប្រចាំប្រទេសកម្ពុជា បានមានប្រសាសន៍ថា៖ «គម្រោងនេះតំណាងឱ្យជំហានដ៏សំខាន់មួយក្នុងការលើកកម្ពស់អាហារូបត្ថម្ភ និងសុខុមាលភាពរបស់កម្មករ កម្មការិនីរោងចក្រនៅកម្ពុជា។ តាមរយៈការដាក់បញ្ចូលអង្ករមីក្រូសារជាតិទៅក្នុងរបបអាហារប្រចាំថ្ងៃ យើងកំពុងជួយផ្តល់នូវសារធាតុចិញ្ចឹមដែលពួកគាត់ត្រូវការក្នុងការរក្សាសុខភាពឱ្យបានកាន់តែប្រសើរ ដើម្បីអាចទ្រទ្រង់គ្រួសារ និងរួមចំណែកដល់កំណើនសេដ្ឋកិច្ចជាបន្តបន្ទាប់របស់កម្ពុជា»។

ឯកឧត្តម ប៉ាន ប៊ុនធឿន រដ្ឋលេខាធិការក្រសួងផែនការបានគូសបញ្ជាក់ពីការគាំទ្ររបស់រាជរដ្ឋាភិបាលចំពោះគំនិតផ្តួចផ្តើមនេះថា៖ «គម្រោងនេះ គឺជាសក្ខីភាពបង្ហាញពីការប្តេជ្ញាចិត្តរបស់យើងចំពោះសុខុមាលភាពនៃកម្លាំងពលកម្មរបស់កម្ពុជា។ តាមរយៈការដោះស្រាយបញ្ហាកង្វះអាហារូបត្ថម្ភក្នុងចំណោមកម្មករ កម្មការិនីរោងចក្រកាត់ដេរ យើងកំពុងវិនិយោគលើសុខភាព ផលិតភាព និងវិបុលភាពនាពេលអនាគតនៃប្រជាជនយើងដែលជាកត្តាចាំបាច់សម្រាប់ការអភិវឌ្ឍជាតិប្រកបដោយចីរភាព»។

កម្មវិធីស្បៀងអាហារពិភពលោករួមជាមួយដៃគូនានា ដូចជាអង្គការស្បៀង និងកសិកម្មនៃសហប្រជាជាតិ (FAO) អង្គការសុខភាពពិភពលោក (WHO) និងមូលនិធិសហប្រជាជាតិដើម្បីកុមារ (UNICEF) ព្រមទាំងស្ថាប័នរាជរដ្ឋាភិបាល និងភាគីពាក់ព័ន្ធក្នុងវិស័យឯកជនដើម្បីធានាបាននូវការអនុវត្តប្រកបដោយការសម្របសម្រួល និងមានចីរភាព។ គំនិតផ្តួចផ្តើមនេះត្រូវបានរំពឹងថានឹងក្លាយជាគំរូសម្រាប់ការពង្រីកបន្ថែមលើការបញ្ចូលមីក្រូសារជាតិក្នុងចំណីអាហារទៅគ្រប់ប្រព័ន្ធស្បៀងអាហារនៅក្នុងប្រទេសកម្ពុជាក្នុងគោលបំណងសំដៅជំរុញឱ្យបានទូលំទូលាយអំពីការកាត់បន្ថយកង្វះអាហារូបត្ថម្ភ និងលើកកម្ពស់កំណើនសេដ្ឋកិច្ចប្រកបដោយបរិយាបន្ន៕

រូបភាពដោយ៖ សហការី

កិច្ចសន្យាផ្តល់ជំនួយត្រូវបានចុះហត្ថលេខាដោយឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជា និងអ្នកតំណាងស្ថាប័នទទួលជំនួយលោកស្រី ឈីបា មីណា ប្រធានគម្រោងអង្គការទស្សនៈពិភពលោកជប៉ុន និងតំណាងក្រសួងអប់រំ យុវជន និងកីឡាលោកបណ្ឌិត កាន់ ពុទ្ធី ប្រធាននាយកដ្ឋានបឋមសិក្សានៃក្រសួងអប់រំ យុវជន និងកីឡា។

គម្រោងនេះមានគោលបំណងកែលម្អលទ្ធផលសិក្សាផ្នែកអប់រំកុមារតូច និង​ការអប់រំបឋមសិក្សាក្នុងខេត្តកំពង់ធំ។ដែលគម្រោងនឹងមានការពង្រឹងសមត្ថភាពគ្រូបង្រៀននៅក្នុងសាលាគោលដៅតាមរយៈការបណ្តុះបណ្តាលគ្រូដើម្បីអនុវត្តថា្នក់បំប៉ងដោយផ្អែកលើការវាយតម្លៃការសិក្សា និងការកែលម្អបរិយាកាសសិក្សា។

ឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជា ថ្លែងប្រាប់ឱ្យដឹងនៅថ្ងៃចុះចុះហត្ថលេខាថា​៖ «រដ្ឋាភិបាលជប៉ុននឹងផ្ដល់ថវិកាប្រមាណ ៤៩ម៉ឺនដុល្លារអាមេរិកដល់អង្គការអង្គការទស្សនៈពិភពលោក (World Vision Japan) សម្រាប់អនុវត្តគម្រោងរបស់អង្គការនៅក្នុងខេត្តកំពង់ធំ»។

លោកបន្ថែមថា៖ «ចាប់តាំងពីឆ្នាំ១៩៩៦ អង្គការទស្សនៈពិភពលោកជប៉ុនបាននិងកំពុងអនុវត្តសកម្មភាពទាក់ទង នឹងសុខភាព អនាម័យ ការអប់រំ និងការលើកកម្ពស់ប្រាក់ចំណូលតាមរយៈការអភិវឌ្ឍន៍សហគមន៍នៅក្នុងខេត្តនានានៃប្រទេសកម្ពុជា។ តំណាងឱ្យរដ្ឋាភិបាលជប៉ុន យើងខ្ញុំសូមសម្តែងនូវការគោរពដ៏ជ្រាលជ្រៅរបស់ជាថ្មីម្តងទៀតចំពោះសមទ្ធផលដ៏ធំធេងជាច្រើនឆ្នាំរបស់អង្គការ»។

គួរបញ្ជាក់ថា ជំនួយឥតសំណងសម្រាប់គម្រោងអង្គការក្រៅរដ្ឋាភិបាលជប៉ុនបានចាប់ផ្ដើមផ្តល់ឱ្យប្រទេសកម្ពុជាក្នុងឆ្នាំ២០០២ ដើម្បីគាំទ្រដល់សកម្មភាពរបស់អង្គការក្រៅរដ្ឋាភិបាលជប៉ុនក្នុងកិច្ចខិតខំប្រឹងប្រែងដើម្បីជួយដល់ ការអភិវឌ្ឍ និងស្ថាបនាប្រទេសកម្ពុជាឡើងវិញនៅកម្រិតមូលដ្ឋាន។ ចាប់តាំងពីឆ្នាំ២០០២ មក រដ្ឋាភិបាលជប៉ុនបានផ្តល់ថវិកាជាង ៦០លាន ដុល្លារអាមេរិកដល់គម្រោងចំនួន ១៧០ ដែលផ្តោតសំខាន់ទៅលើវិស័យអប់រំនៅកម្រិតបឋមសិក្សា វិស័យសុខាភិបាល វិស័យកសិកម្ម និងសកម្មភាពបោសសម្អាតមីនក្នុងប្រទេសកម្ពុជា៕

រូបភាពដោយ៖ សហការី

ការប្រកួតប្រចាំឆ្នាំ២០២៦ នេះ មានការចូលរួមពីកីឡាករ-កីឡាការិនីដែលជាសមាជិកនៃក្លឹបកេនដូភ្នំពេញរួមទាំងគ្រូបង្វឹកជាជនជាតិបរទេសជាច្រើនអ្នកផងដែរ។ បន្ថែមពីនេះ អ្វីដែលគួរឱ្យកត់សម្គាល់ពីការក្រកួតនេះ គឺវត្តមានអាជ្ញាកណ្តាមកពីប្រទេសវៀតណាមលោក សុីគីរូ អុីម៉ាមូរ៉ា គ្រូបង្វឹកចាំផ្ទះលោក សូតា ណាកាហ្កាវា​ និងគ្រូបង្វឹកជនជាតិជប៉ុនចូលរួមដាក់ពិន្ទុដោយសុក្រឹត។

ព្រឹត្តិការណ៍សំខាន់នៃការប្រកួតនេះមិនត្រឹមតែផ្ដោតលើការឈ្នះចាញ់ប៉ុណ្ណោះទេ ប៉ុន្តែគឺដើម្បីបង្ហាញពីស្មារតី បច្ចេកទេសដាវ និងចលនារាងកាយដែលត្រូវតែស៊ីចង្វាក់គ្នាតែមួយ។ បន្ទាប់ពីការប្រកួតយ៉ាងស្វិតស្វាញពេញមួយព្រឹកក្លឹបកេនដូភ្នំពេញបានរកឃើញកីឡាករ-កីឡាការិនីដែលជាម្ចាស់ជ័យលាភីពីការប្រកួតកម្រិតដំបូង​ គឺ លាភ សម្បត្តិ និង ឈួន ច័ន្ទម៉ូលីកា។ ចំណែកឯការប្រកួតស្រ្តីទោលម្ចាស់ជើងឯកលេខមួយក្នុងព្រឹត្តិការណ៍បនេះបានទៅកីឡាការនី ហេង ឆេងលីន និងចំណាក់ថ្នាក់លេខពីរបានទៅលើកីឡាការនី ឌី សុផា។

ការប្រកួតជើងឯកផ្នែកបុរសម្ចាស់ជ័យលាភីលេខមួយបានទៅកីឡាករ វេង សៀវឡុង ចំណាក់ថ្នាក់លេខពីរបានទៅកីឡាករ នីកូឡៃ គុចគីន និងចំណាក់ថ្នាក់លេខបី កីឡាករ វេង សេងហុត។ ចំណែកឯការប្រកួតកម្រិតជាន់ខ្ពស់ (ដាន់) ម្ចាស់ជ័យលាភីលេខមួយបានទៅកីឡាករជនជាតិជប៉ុនកម្រិន៤ដាន់ ម៉ាសាហ៊ីរ៉ូ យ៉ាហ្គី ម្ចាស់ជ័យលាភីលេខពីរបានទៅលើកីឡាករជនជាតិជប៉ុនវ័យ២១​ឆ្នាំ កម្រិត​៤ដាន់ ហ៊ីរ៉ូតូ អាអូគី និងលេខបីបានទៅលើកីឡាករជនជាតិជប៉ុន រីយ៉ូតា អ៊ីស៊ីហារ៉ា កម្រិត​៣ដាន់។

គួរបញ្ជាក់ថា កេនដូ គឺជាសិល្បៈក្បាច់គុនជប៉ុនសម័យទំនើបមានដើមកំណើតមកពីកេនជូតស៊ូដោយប្រើប្រាស់ដាវឫស្សី និងគ្រឿងសឹកការពារ។ វាជាកីឡាលំហាត់ដាវរបស់អ្នកចម្បាំងសាមូរ៉ៃ ហើយសព្វថ្ងៃនេះកីឡានេះត្រូវបានហាត់យ៉ាងទូលំទូលាយនៅក្នុងប្រទេសជប៉ុន និងបានរីករាលដាលដល់ប្រទេសជាច្រើនទៀតនៅទូទាំងពិភពលោក។ សារៈប្រយោជន៍នៃការហ្វឹកហាត់ប្រភេទកីឡាកេនដូនេះ គឺទទួលបានសុខភាពល្អទាំងផ្លូវកាយ និងផ្លូវចិត្ត កម្លាំងមាំមួន ប្រាជ្ញាវាងវៃ មានវិន័យល្អព្រមទាំងរួមចំណែកកសាងធនធានមនុស្ស និងសង្គមជាតិ៕

រូបភាពដោយ៖ ស្រី គំនិត និងសាន់តេរីអូ ជូលៀន បេកឃើរ

កិច្ចសន្យាផ្តល់ជំនួយត្រូវបានចុះហត្ថលេខាដោយ ឯកឧត្តម អ៊ូអ៊ិណុ អាត់ស៊ូស៊ី ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំកម្ពុជា និងអ្នកតំណាងស្ថាប័នទទួលជំនួយពីអង្គការមូលនិធិសម្រាប់ការអភិវឌ្ឍន៍ និងជំនួយសង្គ្រោះអន្តរជាតិ (FIDR)។ នៅថ្ងែចុះហត្ថលេខា ឯកឧត្តម អ៊ូអ៊ិណុ អាត់ស៊ូស៊ី បានវប្រាប់ឱ្យដឹងថា ជំនួយឥតសំណងសម្រាប់គម្រោងអង្គការក្រៅរដ្ឋាភិបាលជប៉ុនដែលហៅថា «អ៊ុនរ៉េន» បានចាប់ផ្តើមតាំងពីឆ្នាំ២០០២ ដើម្បីគាំទ្រដល់អង្គការក្រៅរដ្ឋាភិបាលជប៉ុនក្នុងការអនុវត្តគម្រោងអភិវឌ្ឍន៍ សេដ្ឋកិច្ច និងសង្គមរបស់ពួកគេនៅក្នុងប្រទេស ឬតំបន់កំពុងអភិវឌ្ឍ។ 

ឯកឧត្តម អ៊ូអ៊ិណុ អាត់ស៊ូស៊ី៖ «រដ្ឋាភិបាលជប៉ុននឹងផ្ដល់ថវិកាប្រមាណ ៣២ម៉ឺនដុល្លារអាមេរិកដល់អង្គការ FIDR សម្រាប់អនុវត្តគម្រោងរបស់ខ្លួននៅក្នុងខេត្តក្រចេះ។ អង្គការ FIDR បានចាប់ផ្តើមកិច្ចសហប្រតិបត្តិការផ្នែកវេជ្ជសាស្ត្រនៅក្នុងប្រទេសកម្ពុជាក្នុងឆ្នាំ1996 ក្នុងគោលបំណងបង្កើតប្រព័ន្ធវេជ្ជសាស្ត្រវះកាត់កុមារ។ ហើយចាប់តាំងពីឆ្នាំ 2017 អង្គការនេះបាននិងកំពុងខិតខំប្រឹងប្រែងពង្រឹងនិងពង្រីកការវះកាត់កុមារនៅក្នុងខេត្តក្រចេះ ដែលជាខេត្តដ៏សំខាន់មួយនៅភូមិភាគឦសាន»។

លោកបន្ថែមថា៖ «ខ្ញុំសង្ឃឹមថាគម្រោងដែលបានចុះហត្ថលេខានាថ្ងៃនេះដំណើរការទៅដោយរលូន និងទទួលបានភាពជោគជ័យនាពេលអនាគត»។

ជំនួយឥតសំណងសម្រាប់គម្រោងអង្គការក្រៅរដ្ឋាភិបាលជប៉ុនបានចាប់ផ្ដើមនៅប្រទេសកម្ពុជាតាំងពីឆ្នាំ២០០២ ដើម្បីគាំទ្រដល់សកម្មភាពរបស់អង្គការក្រៅរដ្ឋាភិបាលជប៉ុនក្នុងកិច្ចខិតខំប្រឹងប្រែងដើម្បីជួយដល់ការអភិវឌ្ឍ និងស្ថាបនាប្រទេសកម្ពុជាឡើងវិញនៅតាមកម្រិតមូលដ្ឋាន។ ចាប់តាំងពីឆ្នាំ២០០២មក រដ្ឋាភិបាលជប៉ុនបានផ្តល់ថវិកាជាង ៦០លានដុល្លារអាមេរិក ដល់គម្រោងចំនួន ១៧០ដែលផ្តោតសំខាន់ទៅលើវិស័យ អប់រំនៅកម្រិតបឋមសិក្សា វិស័យសុខាភិបាល វិស័យកសិកម្ម និងសកម្មភាពបោសសម្អាតមីនក្នុងប្រទេសកម្ពុជា៕

រូបភាពដោយ៖ សហការី

កិច្ចសន្យាផ្តល់ជំនួយ ត្រូវបានចុះហត្ថលេខានៅថ្ងៃនេះ ដោយឯកឧត្តម អ៊ូអ៊ិណុ អាត់ស៊ូស៊ី ឯកអគ្គរាជទូត វិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា និង តំណាងស្ថាប័លោក ឌឹម នី អភិបាលរងនៃគណៈអភិបាលខេត្តមណ្ឌលគិរី លោក កោ គីមអាន នាយកមជ្ឈមណ្ឌលបណ្ដុះបណ្ដាលវិជ្ជាជីវៈខេត្តមណ្ឌលគិរី និងលោក ឡាយ សុទ្ធី ប្រធានស្ដីទីមន្ទីរធនធានទឹក និងឧតុនិយមខេត្តបន្ទាយមានជ័យ។

ដោយឯកឧត្តម អ៊ូអ៊ិណុ អាត់ស៊ូស៊ី ថ្លែងប្រាប់ថា រដ្ឋាភិបាលជប៉ុនបាននិងកំពុងផ្តល់ជំនួយឥតសំណងគូសាណូណ៌នៅកម្ពុជាចាប់តាំងពីឆ្នាំ១៩៩១ ដើម្បីជួយដោយផ្ទាល់ដល់អាជ្ញាធរមូលដ្ឋាន និងអង្គការក រដ្ឋាភិបាលនានា ក្នុងការអនុវត្តគម្រោងរបស់ពួកគាត់។ គូសាណូណ៌ មានន័យថា «ឬសស្មៅ» ក្នុងភាសា ជប៉ុន ហើយក្នុងរយៈពេលជាង ៣០ឆ្នាំកន្លងមកនេះ ស្ថានទូតជប៉ុនបានអនុវត្តជាង ៧០០គម្រោង នៅទូទាំងប្រទេសកម្ពុជា តាមរយៈគ្រោងការណ៍ជំនួយឥតសំណងគូសាណូណ៌។

សម្រាប់គម្រោងទី១ ដែលនឹងអនុវត្តដោយមន្ទីរធនធានទឹក និងឧតុនិយមខេត្តបន្ទាយមានជ័យ រដ្ឋាភិបាលជប៉ុនផ្តល់ថវិកាចំនួន ២២០,២១៦ ដុល្លារអាមេរិក (ពីររយម្ភៃពាន់ពីររយដប់ប្រាំមួយដុល្លារ អាមេរិក) សម្រាប់ការស្តារប្រព័ន្ធធារាសាស្ត្រក្នុងខេត្តបន្ទាយមានជ័យ។

ដោយឯកឧត្តម អ៊ូអ៊ិណុ អាត់ស៊ូស៊ី ថា៖ «គម្រោងនេះនឹងរួមចំណែកដល់ការផ្គត់ផ្គង់ទឹកសម្រាប់កសិកម្មប្រកបដោយស្ថិរភាពដល់ប្រជាជនមូលដ្ឋានប្រមាណ ៦,០០០នាក់ នៅទូទាំង ៦ភូមិដែលនាំមកនូវការកែលម្អរផលិតកម្មកសិកម្ម និងលើកកម្ពស់គុណភាពជីវិតរបស់ប្រជាជនមូលដ្ឋាន។ បន្ថែមពីនេះ រដ្ឋាភិបាលជប៉ុនរំពឹងថា គម្រោងនេះនឹងគាំទ្រដល់ឱកាសការងារផ្នែកកសិកម្មសម្រាប់ ប្រជាជនកម្ពុជាដែលបានត្រឡប់មកពីប្រទេសថៃវិញ ដោយសារស្ថានភាពព្រំដែនកម្ពុជា-ថៃ»។

សម្រាប់គម្រោងទី២ ដែលនឹងអនុវត្តដោយមជ្ឈមណ្ឌលបណ្តុះបណ្តាលវិជ្ជាជីវៈខេត្តមណ្ឌលគិរី រដ្ឋាភិបាលជប៉ុនផ្ដល់ថវិកាចំនួន ៨១,៦៨៨ ដុល្លារអាមេរិក (ប៉ែតសិបមួយពាន់ប្រាំមួយរយប៉ែតសិបប្រាំបីដុល្លារអាមេរិក) ដើម្បីសាងសង់អន្តេវាសិកដ្ឋាននិស្សិតស្រី និងផ្តល់ឧបករណ៍បណ្តុះបណ្តាលវិជ្ជាជីវៈ ថ្មីៗ។

ឯកអគ្គរាជទូតបនថែមថា៖ «អន្តេវាសិកដ្ឋាននឹងផ្ដល់ឱ្យនិស្សិតស្រីនូវកន្លែងស្នាក់នៅប្រកបដោយផាសុកភាព ហើយឧបករណ៍ដែលនឹងជួយពួកគេក្នុងការថ្មីនឹងផ្តល់ឱ្យនិស្សិតទាំងអស់នូវឱកាស ដើម្បីរៀននូវជំនាញវិជ្ជាជីវៈនានា ស្វែងរកការងារបន្ទាប់ពីបញ្ចប់ការសិក្សា»។

គម្រោងគូសាណូណរបស់ជប៉ុនបានចាប់ផ្តើមនៅប្រទេសកម្ពុជានៅឆ្នាំ១៩៩១ ដើម្បីគាំទ្រដល់កិច្ចខិតខំប្រឹងប្រែងរបស់កម្ពុជាក្នុងការអភិវឌ្ឍ និងស្ថាបនាប្រទេសឡើងវិញនៅតាមកម្រិតមូលដ្ឋានជំនួយឥតសំណងគូសាណូណ៌មានទិសដៅការពារជនងាយរងគ្រោះពីកត្តាមួយចំនួនដូចជា ភាពក្រីក្រ និង/ឬ ភាព អកុសលនានា ដែលអាចគំរាមកំហែងដោយផ្ទាល់ដល់អាយុជីវិត ជីវភាពរស់នៅ និងសេចក្ដីថ្លៃថ្នូររបស់ពួកគេ។

ជំនួយឥតសំណងគូសាណូណិក៏ផ្តោតលើការអភិវឌ្ឍនូវភាពម្ចាស់ការលើខ្លួនឯងរបស់ប្រជាសហគមន៍។ ចាប់តាំងពីឆ្នាំ១៩៩១ រដ្ឋាភិបាលជប៉ុនបានផ្ដល់ថវិកាជាង ៧២លានដុល្លារអាមេរិកដល់អាជ្ញាធរមូលដ្ឋាន និងអង្គការក្រៅរដ្ឋាភិបាល ដើម្បីគាំទ្រពួកគេក្នុងការអនុវត្តគម្រោងគូសាណូណជាង ៧០០គម្រោងនៅទូទាំងប្រទេសកម្ពុជា៕

រូបភាពដោយ៖ សហការី

កិច្ចសន្យាផ្តល់ជំនួយបានចុះហត្ថលេខានៅថ្ងៃទី០៤ ខែកុម្ភៈ ឆ្នាំ២០២៦ ក្រោមវត្តមានឯកឧត្តម អ៊ូអ៊ិណុ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជា អ្នកតំណាងអង្គការសកម្មភាពកំចាត់មីនជប៉ុន (JMAS) លោក ស៊ូអ៊ិយ៉ាស៊ូ ម៉ាសាយូគ៌ នាយកគម្រោងអង្គការ JMAS និងលោកបណ្ឌិត អ៊ីរ៉ាណុ ស៊ិហ្គេយ៏គិ។

ឯកឧត្តម អ៊ូអ៊ិណុ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជាបានថ្លែងប្រាប់ឱ្យដឹងថា រដ្ឋាភិបាលជប៉ុនរួមទាំងរូបលោកផ្ទាល់ ស្វាគមន៍ការសម្រេចបាននូវកិច្ចព្រមព្រៀងបទឈប់បាញ់លើកទីពីររវាងកម្ពុជា និងថៃកាលពីថ្ងៃទី២៧ ខែធ្នូ និងការវិលត្រឡប់របស់ទាហានកម្ពុជា ១៨រូប កាលពីថ្ងៃទី៣១ ខែធ្នូ ហើយជប៉ុនសង្ឃឹមយ៉ាងមុតមាំថាកិច្ចព្រមព្រៀងបទបទឈប់បាញ់នឹងត្រូវបានបន្តអនុវត្តយ៉ាងប្រាកដប្រជា។ បន្ថែមពីនេះ រដ្ឋាភិបាលជប៉ុនសន្យាថានឹងបន្តកិច្ចខិតខំប្រឹងប្រែងដើម្បីជំរុញការកាត់ បន្ថយភាពតានតឹងដោយសហការជាមួយប្រទេសពាក់ព័ន្ធព្រមទាំងផ្តល់ការគាំទ្រនានាផងដែរ ។

លោកថា ជំនួយឥតសំណងសម្រាប់គម្រោងអង្គការក្រៅរដ្ឋាភិបាលជប៉ុន «អ៊ុនរ៉េន» បានចាប់ផ្តើមតាំងពីឆ្នាំ២០០២ ដើម្បីគាំទ្រដល់អង្គការក្រៅរដ្ឋាភិបាលជប៉ុនក្នុងការអនុវត្តគម្រោងអភិវឌ្ឍន៍ សេដ្ឋកិច្ច និងសង្គមរបស់ពួកគេនៅក្នុងប្រទេស ឬតំបន់កំពុងអភិវឌ្ឍ។ ក្នុងរយៈពេល២០ឆ្នាំចុងក្រោយនេះ ស្ថានទូតជប៉ុនបានផ្តល់ជំនួយជាង ១៦០គម្រោងនៅក្នុងប្រទេសកម្ពុជាតាមរយៈកម្មវិធីនេះ ហើយគម្រោងទាំងនេះបានចូលរួមចំណែកដោយផ្ទាល់ក្នុងការកែលម្អគុណភាពជីវិតរបស់ប្រជា ជនកម្ពុជា។

អង្គការ JMAS បានចាប់ផ្តើមសកម្មភាពគាំទ្រការបោសសម្អាតមីន និងយុទ្ធភណ្ឌមិនទាន់ផ្ទុះនៅកម្ពុជាក្នុងឆ្នាំ២០០២ ហើយចាប់តាំងពីពេលនោះមកអង្គការបានបោសសម្អាតមីន និងយុទ្ធភណ្ឌមិនទាន់ផ្ទុះជាច្រើនដោយសហការជាមួយនឹងមជ្ឈមណ្ឌលសកម្មភាពកំចាត់មីនកម្ពុជា (CMAC)។ សម្រាប់គម្រោងដែលបានចុះហត្ថលេខានាថ្ងៃនេះ អង្គការ JMAS នឹងបន្តធ្វើការបោសសម្អាតគ្រាប់បែកចង្កោមក្នុងខេត្តស្ទឹងត្រែង ព្រមទាំងផ្តល់ការអប់រំអំពីការជៀសវាងពីគ្រោះថ្នាក់ និងផ្ដល់ ជំនួយផ្នែកកសិកម្ម។

ឯកឧត្តម អ៊ូអ៊ិណុ អាត់ស៊ូស៊ី ថា៖ «យើងសង្ឃឹមថា គម្រោងនេះនឹងជួយកាត់បន្ថយការស្លាប់ និងរបួសរបស់ប្រជាជនដែលបណ្តាលមកពីគ្រាប់មីន និងយុទ្ធភណ្ឌមិនទាន់ផ្ទុះ ធានាបាននូវសុខសុវត្ថិភាពដល់ប្រជាជន នៅតំបន់ទាំងនោះ និងលើកកម្ពស់ការអភិវឌ្ឍប្រកបដោយចីរភាពនៅក្នុងសហគមន៍មូលដ្ឋាន»។

លោកបន្ថែមថា៖ «លើសពីនេះ កិច្ចខិតខំប្រឹងប្រែងនេះក៏នឹងរួមចំណែកដល់ការសម្រេចបាននូវការលប់បំបាត់តំបន់ដែលមានគ្រាប់បែបចង្កោមដែលជាគោលដៅរបស់រដ្ឋាភិបាលកម្ពុជា»។

នៅក្នុងដំណាក់កាលទី២ ជប៉ុនសង្ឃឹមថា តាមរយៈការអភិវឌ្ឍធនធានមនុស្ស និងការពង្រឹងសមត្ថភាពអនុវត្តទាក់ទងនិងការបោសម្អាតគ្រាប់មិនទាន់ផ្ទះ នឹងដំណើរការបានលឿន និងសុវត្ថិភាព ជាងមុន មិនត្រឹមតែនៅក្នុងខេត្តស្ទឹងត្រែងប៉ុណ្ណោះទេ ប៉ុន្តែថែមទាំងនៅក្នុងតំបន់ដែលមាននៅសល់គ្រាប់មិនទាន់ផ្ទុះផ្សេងទៀតផងដែរ។

សូមបញ្ញជាក់ថានៅក្នុងគម្រោងនេះអង្គការ JMAS នឹងបោសសម្អាតតំបន់ដែលមានគ្រាប់បែកចង្កោមចំនួន ១៧០ហិចតា និងបង្រៀនមជ្ឈមណ្ឌលសកម្មភាពកំចាត់មីនកម្ពុជា (CMAC) អំពីវិធីសាស្ត្រដែលមានសក្តិសិទ្ធភាព និងសុវត្ថិភាពក្នុងការបោសសម្អាតគ្រាប់បែកចង្កោម។ មិនតែប៉ុណ្ណោះ គម្រោងនេះនឹងផ្តល់ការអប់រំអំពីការបញ្ចៀសពីហានិភ័យនៃគ្រាប់មីន ដល់ប្រជាជនមូលដ្ឋាន និងបណ្ដុះបណ្ដាលកសិករអំពីការគ្រប់គ្រង និងបច្ចេកវិទ្យាកសិកម្ម៕

រូបភាពដោយ៖ សហការី

ចាប់តាំងពីបើកដំណើរការនៅថ្ងៃទី៦ ខែមករា ឆ្នាំ២០២១ មក សណ្ឋាគារបានរួមបញ្ចូលគ្នានូវរចនាប័ទ្មសម័យទំនើប ជាមួយនឹងភាពថ្លៃថ្នូរផ្នែកប្រវត្តិសាស្ត្រនៃ «វីឡាក្សត្រី» (Royal Villa) ដើម្បីបង្កើតបទពិសោធន៍ដ៏វិសេសវិសាលសម្រាប់ភ្ញៀវជាតិ និងអន្តរជាតិ។

ដើម្បីអបអរសាទរក្នុងឱកាសនេះ សណ្ឋាគារ ហៃយ៉ាត់ រីជិនស៊ី ភ្នំពេញនឹងផ្តល់ជូននូវតម្លៃពិសេសត្រឹមតែ ១០០ +++ ដុល្លារអាមេរិកក្នុងមួយយប់ សម្រាប់ ប្រភេទបន្ទប់គ្រែមួយ ឬ ប្រភេទបន្ទប់គ្រែពីរ (សម្រាប់តែបន្ទប់ស្នាក់នៅ)។

• រយៈពេលនៃការកក់៖ ចាប់ពីថ្ងៃទី៥ ដល់ថ្ងៃទី១៥ ខែមករា ឆ្នាំ២០២៦
• រយៈពេលនៃការស្នាក់នៅ៖ ចាប់ពីថ្ងៃទី៦ ខែមករា ដល់ថ្ងៃទី៣១ ខែមីនា ឆ្នាំ២០២៦

ភ្ញៀវស្នាក់នៅអាចទទួលបានបទពិសោធន៍ដ៏សម្បូរបែបនៃវប្បធម៌ទីក្រុងភ្នំពេញចាប់ពីការទស្សនាព្រះបរមរាជវាំង និងសារមន្ទីរជាតិរួមទាំងរីករាយជាមួយសេវាកម្មម្ហូបអាហារដ៏រស់រវើកនៅក្នុងសណ្ឋាគារ។​ ទទួលទានអាហារពេញមួយថ្ងៃនៅភោជនីយដ្ឋាន និងឡោញ ម៉ាឃីត កាហ្វេ (Market Cafe)  និងបារលើដំបូល FiveFive ដែលបម្រើជូននូវស្រាក្រឡុកដ៏ពិសេសនៅ Metropole Underground ដែលជាទីតាំងជួបជុំគ្នាយ៉ាងរីករាយជាមួយការកម្សាន្តជារៀងរាល់យប់។

សណ្ឋាគារ ហៃយ៉ាត់ រីជិនស៊ី ភ្នំពេញបង្កើនភាពវិសេសវិសាលរាល់ការស្នាក់នៅជាមួយនឹងសេវាកម្មដែលទទួលបានពានរង្វាន់ជា «សណ្ឋាគារក្នុងក្រុងដ៏ល្អបំផុតប្រចាំប្រទេសកម្ពុជា»។ បន្ទប់ប្រជុំទំនើបៗ មានការយកចិត្តទុកដាក់ខ្ពស់តាមរយៈសេវាកម្ម Regency Club នៅជាន់ The Attic  ដោយឆ្លុះបញ្ចាំងពីការប្តេជ្ញាចិត្តរបស់ Hyatt ក្នុងការថែទាំភ្ញៀវកិត្តិយស។

លោក Juan Mercadante អគ្គនាយកគ្រប់គ្រងសណ្ឋាគារ៖ «សូមអញ្ជើញមកទទួលយកការផ្តល់ជូនពិសេសក្នុងឱកាសខួប៥ ឆ្នាំរបស់យើង ខណៈដែលយើងបន្តផ្តល់នូវសេវាកម្មបដិសណ្ឋារកិច្ចដ៏ល្អឯក និងបទពិសោធន៍ដែលមិនអាចបំភ្លេចបាន»។

រូបភាពដោយ៖ សហការី

កិច្ចសន្យាផ្តល់ជំនួយត្រូវបានចុះហត្ថលេខានៅថ្ងៃថ្ងៃទី១៦ ខែធ្នូ ឆ្នាំ២០២៥ ដោយ ឯកឧត្តម អ៊ូអ៊ិណុ អាត់ស៊ូស៊ី ឯកអគ្គរាជទូតវិសាមញ្ញជប៉ុននៅកម្ពុជា និងឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា។ជំនួយនេះនឹងត្រូវបានប្រើប្រាស់ដើម្បីសាងសង់ជម្រកសម្រាប់ស្ត្រីរងគ្រោះដោយការជួញដូរមនុស្ស និងសាងសង់អគារស្នាក់នៅបុគ្គលិកសម្រាប់មជ្ឈមណ្ឌលសំចត និងស្តារនីតិសម្បទាជនរងគ្រោះកណ្តាលស្ទឹង។

អគារទាំងនោះនឹងជួយផ្តល់សុវត្ថិភាព និងការការពារដល់ជនរងគ្រោះក៏ដូចជាជួយឱ្យបុគ្គលិកអាចផ្តល់សេវាថែទាំដែលសមស្របបន្ថែមពីនេះគម្រោងនឹងជួយគាំទ្រជនរងគ្រោះក្នុងស្ថានភាពងាយរងគ្រោះផ្សេងៗ ទាំងផ្លូវ កាយ ឬផ្លូវចិត្ត ដើម្បីឱ្យអ្នកដែលរស់រានមានជីវិតអាចវិលត្រឡប់មកជីវិតប្រចាំថ្ងៃរបស់ពួកគេវិញបាន។

នៅថ្ងៃចុះហត្ថលេខាកិច្ចសន្យាផ្តល់ជំនួយឯកឧត្តម អ៊ូអ៊ិណុ អាត់ស៊ូស៊ី ឯកអគ្គរាជទូតជប៉ុននៅកម្ពុជាបានបង្ហាញចំណាប់អារម្មណ៍ថា​៖ «ខ្ញុំមានសេចក្តីសោមនស្សរីករាយដោយបានសង្កេតឃើញការអភិវឌ្ឍយ៉ាងឆាប់រហ័សនៅប្រទេសកម្ពុជា នាពេលថ្មីៗនេះ។ បើទោះជាយ៉ាងណាក្តី ខ្ញុំក៏ទទួលស្គាល់ថានៅតែមានបញ្ហាប្រឈមមួយចំនួនដែលត្រូវដោះស្រាយ ដើម្បីកែលម្អគុណភាពជីវិតរបស់ប្រជាជន។ ដូចនេះជប៉ុននឹងបន្តចូលរួមចំណែកក្នុងការដោះស្រាយបញ្ហាប្រឈមទាំងនេះ តាមរយៈគ្រោងការណ៍ជំនួយអភិវឌ្ឍន៍ផ្លូវការផ្សេងៗ រួមទាំងគម្រោង គូសាណូណ៌ផងដែរ»។

គួរបញ្ជាក់ថាគម្រោងគូសាណូណ៌របស់ជប៉ុនបានចាប់ផ្តើមនៅប្រទេសកម្ពុជានៅឆ្នាំ១៩៩១ ក្នុងគោលបំណងគាំទ្រដល់កិច្ចខិតខំប្រឹងប្រែងរបស់កម្ពុជាក្នុងការអភិវឌ្ឍ និងស្ថាបនាប្រទេសឡើងវិញនៅតាមកម្រិតមូលដ្ឋានដែលជំនួយឥតសំណងនេះ មានទិសដៅការពារជនងាយរងគ្រោះពីកត្តាមួយចំនួនដូចជា ភាពក្រីក្រ និងភាពអកុសលនានាដែលអាចគំរាមកំហែងដោយផ្ទាល់ដល់អាយុជីវិត ជីវភាពរស់នៅ និងសេចក្ដីថ្លៃថ្នូររបស់ប្រជាពលរដ្ឋក៏ដូចជាជួយជំរុញនូវភាពម្ចាស់ការលើខ្លួនឯងរបស់ប្រជាសហគមន៍។ ចាប់តាំងពីឆ្នាំ១៩៩១ រដ្ឋាភិបាលជប៉ុនបានផ្ដល់ថវិកាជាង ៧២លានដុល្លារអាមេរិកដល់អាជ្ញាធរមូលដ្ឋាន និងអង្គការក្រៅរដ្ឋាភិបាលដើម្បីអនុវត្តគម្រោង គូសាណូណ៌ ជាង៧០០គម្រោងនៅទូទាំងប្រទេសកម្ពុជា៕

រូបភាពដោយ៖ សហការី

ពិធីបុណ្យ «ឌីប៉ាវ៉ាលី – Deepawali» ជានិមិត្តរូបនៃការវិលត្រឡប់មកផ្ទះវិញដ៏រីករាយរបស់ព្រះរាម។ ការចុះបញ្ជីនៃពិធីបុណ្យនេះ គឺជាសម្បត្តិ​ទី១៦ដែលមានប្រភពពីចេញប្រទេស​ឥណ្ឌា។ សម្បត្តិបេតិផ្សេងៗ ទៀតដែលមានប្រភពពីឥណ្ឌាហើយត្រូវបានចុះបញ្ជីបេតិកភ៏ណ្ឌពិលោកមានដូចជារបាំ Ramlila, Chhau Dance, Kalbelia និងពិធីបុណ្យដូចជា Kumbh Mela, Durga Puja, Navruz ​យូហ្គា និងការសូត្រមន្ត។

ពិធីបុណ្យពន្លឺ Deepawali ត្រួវបានទទួលស្គាល់ជាសាកលដោយលោកនាយករដ្ឋមន្ត្រីឥណ្ឌា Narendra Modi បន្ថែមពីនេះលោកមានប្រសាសន៍ថា៖ «Deepawali មានទំនាក់ទំនងយ៉ាងជិតស្និទ្ធទៅនឹងវប្បធម៌ និងសីលធម៌របស់យើង។ វា គឺជាព្រលឹងនៃអរិយធម៌របស់យើង។ វាតំណាងឱ្យពន្លឺ និងសុចរិតភាព។ ការដាក់បញ្ជូល​ Deepwali ទៅក្នុងបញ្ជីបេតិកភណ្ឌអរូបីរបស់អង្គការយូណេស្កូនឹងធ្វើឱ្យពិធីបុណ្យមានប្រជាប្រិយភាព​ទូទាំងពិភពលោកបន្ថែមទៀត»។

រូបភាពដោយ៖ សហការី