ភ្នំពេញ៖ នៅថ្ងៃទី២៧ ខែកញ្ញា ឆ្នាំ២០២៦ នេះ ស្ថានទូតឥណ្ឌាប្រចាំក្រុងភ្នំពេញបានរៀបចំព្រឹត្តិការណ៍រត់ចម្ងាយ ៥ គីឡូម៉ែត្រ “Viksit Bharat Run 2026” នៅសួនវត្តបទុមវតី ដោយមានអ្នកចូលរួមជាង២៥០នាក់ ដើម្បីលើកកម្ពស់សុខភាព កាយសម្បទា សាមគ្គីភាពក្នុងសហគមន៍ និងពង្រឹងទំនាក់ទំនងមិត្តភាពរវាងប្រជាជន និងប្រជាជននៃប្រទេសឥណ្ឌា និងកម្ពុជា។
ព្រឹត្តិការណ៍នេះមានការចូលរួមពីសមាជិកសហគមន៍ឥណ្ឌាដែលរស់នៅកម្ពុជា ប្រជាពលរដ្ឋកម្ពុជា សិស្ស និស្សិត អ្នកជំនាញ និងអ្នកដែលស្រឡាញ់ការរត់ដែលជាសកម្មភាពកីឡាដ៏ពេញនិយមមួយប្រភេទផងដែរ។ ផ្លូវរត់ចម្ងាយ ៥ គីឡូម៉ែត្រ បានចាប់ផ្តើមពីសួនវត្តបទុមវតីឆ្ពោះទៅកាន់រង្វង់មូលដើមពោធិ៍ក្បែរវត្តភ្នំ ហើយបន្តរត់ត្រឡប់មកកាន់សួនវត្តបទុមវតីវិញ។ “Viksit Bharat Run 2026” គឺជាផ្នែកមួយនៃកម្មវិធីរត់សកលរបស់ប្រទេសឥណ្ឌាដែលត្រូវបានរៀបចំឡើងនៅក្នុងទីក្រុងសំខាន់ៗចំនួន ១២៥ ទីក្រុងទូទាំងពិភពលោក។
កម្មវិធីនេះមានគោលបំណងលើកទឹកចិត្តប្រជាជនឱ្យប្រកាន់យករបៀបរស់នៅប្រកបដោយសុខភាពល្អ លើកកម្ពស់ការចូលរួមក្នុងសកម្មភាពសហគមន៍ និងសង្គមព្រមទាំងពង្រឹងស្មារតីចូលរួម និងមោទកភាពចំពោះសង្គម និងប្រទេសជាតិ។ ព្រឹត្តិការណ៍នេះក៏មានគោលបំណងផ្សព្វផ្សាយអំពីវឌ្ឍនភាពនៃការអភិវឌ្ឍរបស់ប្រទេសឥណ្ឌា និងចក្ខុវិស័យ “Viksit Bharat 2047” ដែលជាចក្ខុវិស័យរបស់ប្រទេសឥណ្ឌាក្នុងការកសាងប្រទេសឱ្យក្លាយជាប្រទេសអភិវឌ្ឍន៍នៅឆ្នាំ២០៤៧ ឆ្នាំគម្រប់១០០ ឆ្នាំនៃឯករាជ្យភាពរបស់ប្រទេសឥណ្ឌា។
ថ្លែងទៅកាន់អ្នកចូលរួមរត់ និងភ្ញៀវកិត្តិយស ឯកឧត្តម Vanlalvawna Bawitlung ឯកអគ្គរដ្ឋទូតឥណ្ឌាប្រចាំកម្ពុជាបានលើកឡើងអំពីគោលបំណង និងទិសដៅសំខាន់ៗ នៃព្រឹត្តិការណ៍ “Viksit Bharat Run”។ ឯកអគ្គរដ្ឋទូតបានគូសបញ្ជាក់ពីសារៈសំខាន់នៃការចូលរួមរបស់សហគមន៍ និងបានលើកទឹកចិត្តដល់អ្នកចូលរួមឱ្យចូលរួមយ៉ាងសកម្មក្នុងការលើកកម្ពស់ភាពជាដៃគូអន្តរជាតិ និងរួមចំណែកដល់វឌ្ឍនភាពរួមរបស់ពិភពលោក។ ឯកអគ្គរដ្ឋទូតក៏បានសម្តែងនូវការថ្លែងអំណរគុណចំពោះសាលារាជធានីភ្នំពេញសម្រាប់កិច្ចសហការ និងការគាំទ្រដែលបានរួមចំណែកធ្វើឱ្យព្រឹត្តិការណ៍នេះប្រព្រឹត្តទៅដោយរលូន និងជោគជ័យ។
ព្រឹត្តិការណ៍ “Viksit Bharat Run 2026” មិនត្រឹមតែជាសកម្មភាពលើកកម្ពស់សុខភាព និងសុខុមាលភាពប៉ុណ្ណោះទេប៉ុន្តែថែមទាំងជាវេទិកាមួយសម្រាប់ពង្រឹងទំនាក់ទំនងរវាងសហគមន៍ បង្ហាញពីមិត្តភាពដ៏យូរអង្វែង និងទំនាក់ទំនងដ៏រឹងមាំរវាងប្រទេសឥណ្ឌា និងកម្ពុជា៕
រូបភាពដោយ៖ សហការី
