ភ្នំពេញ៖ ស្ថានទូតអាមេរិកនៅភ្នំពេញបានរៀបចំពិធីអបអរសាទរខួបលើកទី២៥០ នៃទិវាឯករាជ្យជាតិសហរដ្ឋអាមេរិកនៅថ្ងៃទី០១ ខែកក្កដានេះ។ ព្រឹត្តិការណ៍នេះបានគូសបញ្ជាក់អំពីស្មារតីយូរអង្វែងរបស់អាមេរិកលើភាពច្នៃប្រឌិត សហគ្រាស និងនយោបាយការទូតដើម្បីបន្តពង្រឹងទំនាក់ទំនងរវាងសហរដ្ឋអាមេរិក និងកម្ពុជា។
លោកស្រី Aleksandra Zittle ភារធារីនៃស្ថានទូតអាមេរិកបានចូលរួមបើកកម្មវិធីដែលរៀបចំឡើងនៅសាលសាលាក្រុងកោះពេជ្រដោយទទួលស្វាគមន៍មន្ត្រីរាជរដ្ឋាភិបាល មន្ត្រីការទូត ថ្នាក់ដឹកនាំធុរកិច្ច តំណាងសង្គមស៊ីវិល និងសមាជិកស្ថានទូតជាង ១០០០នាក់ ដើម្បីរួមគ្នាអបអរសាទរព្រឹត្តិការណ៍ជាប្រវត្តិសាស្ត្រដ៏សំខាន់នេះ។
លោកស្រី ភារធារី Zittle បានថ្លែងសុន្ទរកថារំឮកពីការកកើតដ៏យូរអង្វែងនៃសហរដ្ឋអាមេរិកថា៖ «ផ្ដើមចេញពីដែនដីអាណានិគមតូចៗ ចំនួន១៣ ហើយបានរីកលូតលាស់ទៅជាប្រជាជាតិមួយដែលមានភាពច្នៃប្រឌិត ភាពរឹងមាំផ្នែកសេដ្ឋកិច្ច និងភាពជាអ្នកដឹកនាំដែលបានគូសវាសពិភពលោកសម័យទំនើប ហើយភាពជោគជ័យនេះ គឺជាសក្ខីភាពមួយសម្រាប់អំណាចគង់វង្សយូរអង្វែងនៃសេរីភាព និងការដឹកនាំបែបស្វ័យភាព»។
ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីតំណាងឱ្យរាជរដ្ឋាភិបាលកម្ពុជាបានអញ្ជើញចូលរួមជាគណៈអធិបតីក្នុងព្រឹត្តិការណ៍នេះ។ ក្នុងពិធីនេះ គណៈអធិបតី និងភ្ញៀវកិត្តិយសទាំងអស់បានទស្សនាការដាក់តាំងពិព័រណ៍ផលិតផលពីសំណាក់ក្រុមហ៊ុនអាមេរិកជាច្រើនដែលបង្ហាញពីនវានុវត្តន៍ និងឧត្តមភាពរបស់អាមេរិកក៏ដូចជាទស្សនា នូវពិព័រណ៍ស្ថាបនិកសេរីភាព២៥០ ដែលជាគំនិតផ្តួចផ្តើមរបស់សេតវិមានក្នុងការលើកតម្លៃពីប្រវត្តិសាស្ត្រ វប្បធម៌ និងវីរបុរសអាមេរិកដែលបានស្ថាបនាសហរដ្ឋអាមេរិកក្នុងរយៈពេល ២៥០ឆ្នាំកន្លងមកនេះ។
ក្រុមតន្ត្រី Brass មកពីក្រុមតន្ត្រីកងទ័ពអាកាសអាមេរិកប្រចាំតំបន់ប៉ាស៊ីហ្វិកក៏បានរួមគ្នាជាមួយសិល្បការិនីកម្ពុជា គឺកញ្ញា ស៊ីន សេដ្ឋសុជ្ឈតា ដែលជាអតីតសិក្ខាកាមនៃកម្មវិធីទស្សនកិច្ចអ្នកដឹកនាំអន្តរជាតិ (IVLP) តាមរយៈក្រសួងការបរទេសសហរដ្ឋអាមេរិកដែលកញ្ញាចូលរួមសម្ដែងសិល្បៈតន្ត្រីដ៏ពិសេសមួយតាមបទចម្រៀងនៃប្រទេសទាំងពីរដើម្បីឆ្លុះបញ្ចាំងពីចំណងមិត្តភាព និងភាពជាដៃគូអស់ជាច្រើនទសវត្សរ៍កន្លងមកនេះ។
ស្ថានទូតអាមេរិកប្រចាំភ្នំពេញនឹងបន្តប្រារព្ធពិធីអបអរសាទរក្នុងឆ្នាំដ៏ពិសេសនេះ តាមរយៈយុទ្ធនាការ «សេរីភាព២៥០» ដែលបន្តដាក់បង្ហាញពីឧត្តមភាពអាមេរិកលើកពីតម្លៃប្រវត្តិសាស្ត្ររបស់ខ្លួន និងអបអរសាទរចំពោះសមិទ្ធផលដ៏យូរអង្វែងរបស់សហរដ្ឋអាមេរិក៕
រូបភាពដោយ៖ សហការី
