ពិធីបើកសម្ពោធពិព៌ណ៍អប់រំឥណ្ឌានៅកម្ពុជាស្តីពីឱកាសបន្តការសិក្សាថ្នាក់ឧត្តមសិក្សាសម្រាប់និស្សិតកម្ពុជា

ភ្នំពេញ៖ ថ្ងៃទី២៧ ខែតុលា ឆ្នាំ២០២៥ នេះ ក្រុមហ៊ុន Edunial Group មកពីប្រទេសឥណ្ឌា និងក្រុមហ៊ុន TBC Global Partners បានរួមគ្នារៀបចំពិព៌ណ៍អប់រំ «ឱកាសបន្តការសិក្សាថ្នាក់ឧត្តមសិក្សាសម្រាប់និស្សិតកម្ពុជា» ដែលមានរយៈពេលពិរថ្ងៃគឺនៅថ្ងៃទី២៥ និង២៦ ខែតុលា នៅសណ្ឋាគារហ៊ីម៉ាវ៉ារី។ ព្រឹត្តិការណ៍សំខាន់នេះ មានគោលបំណងពង្រឹងសហការណ៍ផ្នែកអប់រំរវាងប្រទេសឥណ្ឌា និងកម្ពុជា ដោយជំរុញឱ្យមានការតភ្ជាប់ដ៏មានតម្លៃរវាងសាកលវិទ្យាល័យឈានមុខគេនៅឥណ្ឌា ស្ថាប័នអប់រំកម្ពុជា និស្សិត និងដៃគូជាច្រើនទៀត។

ដោយពិធីបើកកម្មវិធីក្រោមវត្តមានលោក សំហេង បុរស រដ្ឋមន្ត្រីប្រតិភូអមនាយករដ្ឋមន្ត្រីកម្ពុជា និងលោក Vanlalvawna Bawitlung ឯកអគ្គរដ្ឋទូតឥណ្ឌាប្រចាំកម្ពុជា លោកបណ្ឌិត សៅ ជីវ័ន្ត រដ្ឋលេខាធិការក្រសួងអភិវឌ្ឍន៍ជនបទ និងប្រធានសមាគមអតីតនិស្សិតកម្ពុជា–ឥណ្ឌា និងលោកបណ្ឌិត សាន វឌ្ឍនា រដ្ឋលេខាធិការក្រសួងអប់រំ យុវជន និងកីឡា។ ពិធីនេះបានទាក់ទាញអ្នកចូលរួមជាង ៣៥០នាក់រួមទាំងនិស្សិត និងតំណាងពីសាកលវិទ្យាល័យឥណ្ឌា និងកម្ពុជា។

លោកឯកអគ្គរដ្ឋទូត Vanlalvawna Bawitlung បានលើកឡើងថា នេះជាសញ្ញាបត្រពីស្ថាប័នអប់រំឥណ្ឌាដែលត្រូវបានទទួលស្គាល់យ៉ាងទូលំទូលាយនៅទូទាំងពិភពលោក។ លោកបានបញ្ជាក់ថា និស្សិតដែលបញ្ចប់ការសិក្សាពីឥណ្ឌាបានរួមចំណែកយ៉ាងសំខាន់ក្នុងការអភិវឌ្ឍពិភពលោក តាមរយៈការស្រាវជ្រាវនៅវិស័យផ្សេងៗ ដូចជា វិទ្យាសាស្ត្រ វិស្វកម្ម បច្ចេកវិទ្យា សង្គមវិទ្យា សិល្បៈ និងវប្បធម៌។

លោកឯកអគ្គរដ្ឋទូតថ្លែងថា៖ «ឱកាសអាហារូបករណ៍សម្រាប់និស្សិតកម្ពុជាដើម្បីបន្តការសិក្សាថ្នាក់បរិញ្ញាបត្រ បរិញ្ញាបត្រជាន់ខ្ពស់ និងបណ្ឌិតដោយរដ្ឋាភិបាលឥណ្ឌាបានផ្តល់អាហារូបករណ៍ពេញលេញប្រចាំឆ្នាំចំនួន៤០ ទៅ៦០កន្លែង។ និស្សិតកម្ពុជានឹងមានឱកាសទទួលអាហារូបករណ៍ពីសាកលវិទ្យាល័យឥណ្ឌាដើម្បីសម្រេចគោលដៅសិក្សា និងអាជីពរបស់ពួកគេ»។

លោកបណ្ឌិត សៅ ជីវ័ន្ត រដ្ឋលេខាធិការ និងជាប្រធានសមាគមអតីតនិស្សិតកម្ពុជា–ឥណ្ឌា បានចែករំលែកបទពិសោធន៍ផ្ទាល់ខ្លួនក្នុងនាមជានិស្សិតនៅប្រទេសឥណ្ឌា ដើម្បីលុបបំបាត់ការយល់ខុសក្នុងចំណោមប្រជាជនកម្ពុជាអំពីប្រទេសឥណ្ឌាជាគោលដៅសិក្សា។ លោកបានបង្ហាញពីមោទនភាពក្នុងការទទួលបានឱកាសទៅសិក្សានៅប្រទេសឥណ្ឌា ដែលជាប្រទេសប្រជាធិបតេយ្យធំបំផុតនៅលើពិភពលោកនៅទសវត្សរ៍ឆ្នាំ១៩៨០។

លោកបណ្ឌិត សៅ ជីវ័ន្ត ថ្លែងថា៖ «ខ្ញុំមានមោទនភាពក្នុងការទទួលបានឱកាសទៅសិក្សានៅប្រទេសឥណ្ឌា ហើយឥណ្ឌានៅតែជាដៃគូសំខាន់មួយក្នុងការកសាងសមត្ថភាព និងការអភិវឌ្ឍនៅកម្ពុជារហូតដល់សព្វថ្ងៃនេះ»។

មានសាកលវិទ្យាល័យឈានមុខគេជាច្រើនមកពីប្រទេសឥណ្ឌារួមមានដូចជា SYMBIOSIS International University, MIT World Peace University, Manav Rachna University, Vellore Institute of Technology  (VIT), JAIN – Bangalore, LPU ​ដែលបានចូលរួមក្នុងព្រឹត្តិការណ៍រយៈពេលពីរថ្ងៃនេះ។

ក្រៅពីការតាំងពិព័រណ៍នេះក៏មានសកម្មភាពពិភាក្សារវាងសាកលវិទ្យាល័យឥណ្ឌា និងកម្ពុជា កម្មវិធី B2B សម្រាប់អ្នកចូលរួមក្នុងវិស័យអប់រំដើម្បីជំរុញឱ្យមានការសន្ទនា និងសហការទៅវិញទៅមក។ ដែលគម្រោងនេះគឺជាជំហានដ៏សំខាន់មួយក្នុងការពង្រឹងកិច្ចសហប្រតិបត្តិការផ្នែកអប់រំរវាងប្រទេសឥណ្ឌា និងកម្ពុជា ដោយផ្តល់ឱកាសសិក្សាបន្ថែមសម្រាប់និស្សិតដើម្បីឆ្លើយតបនឹងការរីកចម្រើននៅក្នុងសម័យសាកលភាវូបនីយកម្ម។ សម្រាប់ព័ត៌មានបន្ថែមអំពីការសិក្សានៅប្រទេសឥណ្ឌាលោកអ្នកអាចចូលមើលបានតាមតំណភ្ជាប់៖ https://studyinindia.gov.in/។

រូបភាពដោយ៖​ សហការី