ស្ថានទូតឥណ្ឌានៅកម្ពុជាប្រារព្ធខួបលើកទី៧៩ នៃបុណ្យឯករាជ្យជាតិឥណ្ឌានៅសណ្ឋាគារ សូហ្វីតែល

ភ្នំពេញ៖ ស្ថានទូតឥណ្ឌាប្រចាំទីក្រុងភ្នំពេញបានប្រារព្ធខួបលើកទី៧៩ដែលជាទិវាបុណ្យឯករាជ្យជាតិឥណ្ឌានៅថ្ងៃទី១៥ ខែសីហា ឆ្នាំ២០២៥ ដោយបានរៀបចំពិធីបង្ហូតទង់ជាតិនៅក្នុងបរិវេណស្ថានទូត និងទទួលបដិសណ្ឋារកិច្ចនៅសណ្ឋាគារ សូហ្វីតែលរាជធានីភ្នំពេញ។ នៅពេលព្រឹកនៃខួបលើកទី​៧៩ ទិវាបុណ្យឯករាជ្យជាតិឥណ្ឌាត្រូវបានរៀបចំបង្ហូតទង់ជាតិដោយឯកអគ្គរដ្ឋទូត Vanlalvawna Bawitlung រួមទាំងមានការច្រៀងបទភ្លេងជាតិ និងថ្លែងសុន្ទរកថាដោយលោកឯកអគ្គរដ្ឋទូតឥណ្ឌាប្រចាំនៅកម្ពុជា។

ការប្រារព្ធពិធីក៏មានការសម្តែងវប្បធម៌ដ៏រស់រវើករួមទាំងរបាំប្រពៃណី ចម្រៀងស្នេហាជាតិ និងការសូត្រកំណាព្យដោយសមាជិកនៃជនភៀសខ្លួនឥណ្ឌា និងមន្ត្រីស្ថានទូត។ បន្ថែមពីនេះកម្មវិធីក៏បានផ្តល់នូវវិញ្ញាបនបត្រកោតសសើរដល់គ្រូយោគៈកម្ពុជាដែលពួកគាត់បានចូលរួមចំណែកនៅទិវាយោគអន្តរជាតិលើកទី១១។

នៅពេលពិធីជប់លៀងអបអរសាទរខួបលើកទី៧៩ នៃបុណ្យឯករាជ្យប្រទេសឥណ្ឌាត្រូវបានរៀបចំឡើងដោយមានវត្តមាន ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មានកម្ពុជា តំណាងមន្ត្រីជាន់ខ្ពស់មកពីស្ថាប័នរដ្ឋ ឯកអគ្គរាជទូត និងអ្នកការទូត ឧកញ៉ាកម្ពុជា ភ្ញៀវកិត្តិយស និងសមាជិកសហគមន៍ឥណ្ឌាមកពីគ្រប់មជ្ឈដ្ឋាននានាផងដែរ។

ឯកអគ្គរដ្ឋទូត Vanlalvawna Bawitlung បានថ្លៃងសុន្ទរកថាស្វាគមន៍យ៉ាងកក់ក្តៅរួមទាំងបានលើកឡើងពីវឌ្ឍនភាពដ៏គួរឱ្យកត់សម្គាល់របស់ប្រទេសឥណ្ឌាក្នុងរយៈពេល៧៨ឆ្នាំចុងក្រោយនេះ ក្នុងនាមជាប្រទេសប្រជាធិបតេយ្យដ៏ធំបំផុតរបស់ពិភពលោក និងសេដ្ឋកិច្ចដ៏ធំដែលរីកលូតលាស់លឿនបំផុត។ គាត់បាននិយាយអំពីគំនិតផ្តួចផ្តើមជាសកលរបស់ឥណ្ឌាដូចជា សម្ព័ន្ធពន្លឺព្រះអាទិត្យអន្តរជាតិ បេសកកម្ម LiFE និង សម្ព័ន្ធខ្លាធំអន្តរជាតិដោយគូសបញ្ជាក់ពីការប្តេជ្ញាចិត្តរបស់ឥណ្ឌាចំពោះភាពល្អប្រសើរជាសកល។

លោកឯកអគ្គរដ្ឋទូតបានសង្កត់ធ្ងន់លើទំនាក់ទំនងអរិយធម៌ដ៏យូរអង្វែង និងទំនាក់ទំនងទ្វេភាគីដ៏រឹងមាំរវាងឥណ្ឌា និងកម្ពុជា។ លោកបានកត់សម្គាល់ថាឥណ្ឌា​រីករាយ​ដែល​បាន​ក្លាយ​ជា​ដៃគូរ​មួយ​ក្នុង​កំណើន​សេដ្ឋកិច្ច​សង្គម​កម្ពុជា និងការអភិរក្សបេតិកភណ្ឌរបស់កម្ពុជាការកសាងសមត្ថភាពតាមរយៈអាហារូបករណ៍ និងកម្មវិធីបណ្តុះបណ្តាល គម្រោងផ្តល់ផលរហ័ស (QIP) កិច្ចសហប្រតិបត្តិការសកម្មភាពមីន និងការបង្កើនការចូលរួមសហការណ៍លើវិស័យការពារជាតិ។

ព្រឹត្តិការណ៍នេះមិនត្រឹមតែអបអរសាទរសមិទ្ធិផលរបស់ឥណ្ឌាប៉ុណ្ណោះទេ ប៉ុន្តែក៏ជាចំណងមិត្តភាពដ៏ជ្រាលជ្រៅ និងយូរអង្វែងរវាងឥណ្ឌា និងកម្ពុជាផងដែរ។ ឯកអគ្គរដ្ឋទូតបានអញ្ជើញអ្នកដែលមានវត្តមានក្នុងកម្មវិធីទាំងអស់ចូលរួមជាផ្នែកនៃដំណើររួមគ្នានេះ​ ដើម្បីឆ្ពោះទៅរកទំនាក់ទំនងរវាងប្រជាជន និងប្រជាជនកាន់តែល្អប្រសើរឡើង និងកិច្ចសហប្រតិបត្តិការលើវិស័យសេដ្ឋកិច្ច។

ឯកឧត្តម នេត្រ ភក្ត្រា បានកោតសរសើរចំពោះការរីកចម្រើនដ៏គួរឱ្យកត់សម្គាល់របស់ប្រទេសឥណ្ឌាចាប់តាំងពីទទួលបានឯករាជ្យ ដោយទទួលស្គាល់ការលេចចេញជាជើងឯកនៃការពឹងផ្អែកលើខ្លួនឯង និងជាតួអង្គសំខាន់ក្នុងកិច្ចការតំបន់ និងពិភពលោក។ លោកបានគូសបញ្ជាក់អំពីចំណងមិត្តភាពកម្ពុជា- ឥណ្ឌាដែលចាក់ឫសយ៉ាងជ្រៅលើផ្នែកនយោបាយ ការពារជាតិ និងសន្តិសុខ ពាណិជ្ជកម្ម និងវិនិយោគ ទេសចរណ៍ ការអប់រំ កសិកម្ម សុខាភិបាល ការដោះមីន វប្បធម៌ និងការផ្សារភ្ជាប់រវាងប្រជាជន និងប្រជាជន។

លោកក៏បានរម្លឹកផងដែរនូវដំណើរទស្សនកិច្ចសំខាន់ៗ រួមទាំងដំណើរទស្សនកិច្ចផ្លូវការចំនួនបីរបស់សម្តេចតេជោ ហ៊ុន សែន ទៅកាន់ប្រទេសឥណ្ឌាក្នុងឆ្នាំ២០០០ ឆ្នាំ២០០៧ និងឆ្នាំ២០១៨ ដំណើរទស្សនកិច្ចផ្លូវរដ្ឋឆ្នាំ២០២៣របស់ព្រះករុណាព្រះបាទសម្តេចព្រះបរមនាថ នរោត្តម សីហមុនី និងដំណើរទស្សនៈកិច្ចឆ្នាំ២០២៣របស់សម្តេចមហាបវរធិបតី ហ៊ុន ម៉ាណែត ក្នុងតួនាទីជាអគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោកកម្ពុជា។

លោកបានថ្លែងអំណរគុណយ៉ាងស្មោះស្ម័គ្រចំពោះតួនាទីដ៏សំខាន់របស់ប្រទេសឥណ្ឌាក្នុងសន្តិភាព និងការកសាងឡើងវិញរបស់កម្ពុជាក្នុងអំឡុងដើមទសវត្សរ៍ឆ្នាំ១៩៩០ ក៏ដូចជាការបន្តគាំទ្រដល់កំណើនសេដ្ឋកិច្ចសង្គមរបស់ព្រះរាជាណាចក្រ ជាពិសេសតាមរយៈកម្មវិធីកិច្ចសហប្រតិបត្តិការបច្ចេកទេស និងសេដ្ឋកិច្ចឥណ្ឌា (ITEC) ដែលបានពង្រឹងសមត្ថភាពធនធានមនុស្សរបស់កម្ពុជា៕

រូបភាពដោយ៖ សហការី